Hollvinir færa skurðlækningadeild göngugrindur

Sjúkrahúsið á Akureyri (SAk) hefur tekið í notkun nýtt Hemoscreen nærrannsóknartæki á bráðamóttöku. Tækið er gjöf frá Hollvinum SAk og markar mikilvægt skref í að efla hraða og gæði þjónustu við sjúklinga. N ærrannsóknir (e. Point of Care Testing, POCT) eru rannsóknir sem framkvæmdar eru nálægt sjúklingi, utan hefðbundinnar rannsóknarstofu. Með slíkum búnaði er hægt að styðja við hraðari greiningu og ákvarðanatöku í meðferð, sem getur skipt sköpum í bráðum aðstæðum. „Markmið nærrannsókna er að styðja við hraðari og markvissari klínískar ákvarðanir, án þess að skerða gæði eða rekjanleika rannsóknaniðurstaðna,“ segir Inga Stella Pétursdóttir, deildarstjóri Rannsóknadeildar SAk. Hemoscreen-tækið bætir aðgengi að nútímalegum rannsóknum beint á vettvangi og styður þannig við skilvirkara verklag á bráðamóttöku. Niðurstöður úr mælingum skrást rafrænt í rannsóknakerfi sjúkrahússins, líkt og aðrar rannsóknaniðurstöður, sem tryggir öryggi, rekjanleika og samfellu í meðferð sjúklinga. „Tækið er mikilvæg viðbót við þá þróun sem hefur átt sér stað í innleiðingu nærrannsókna á SAk. Gjöf Hollvina skiptir hér miklu máli og gerir okkur kleift að efla þjónustuna enn frekar,“ segir Inga Stella. Kristín Ósk Ragnarsdóttir, deildarstjóri bráðamóttöku SAk, segir tækið hafa jákvæð áhrif á daglegt starf deildarinnar: „Á bráðamóttöku skiptir tíminn miklu máli og það að geta fengið niðurstöður hratt, beint við rúm sjúklings, styður við betri og öruggari ákvarðanatöku. Þetta tæki er því mjög dýrmæt viðbót við okkar starfsemi.“ Að sögn Jóhannesar G. Bjarnasonar, formanns Hollvinasamtaka SAk, er það sérstakt ánægjuefni að geta lagt sitt af mörkum til þróunar þjónustunnar: „Það er okkur hjá Hollvinum mjög mikilvægt að styðja við starfsemi sjúkrahússins. Með þessari gjöf viljum við leggja okkar af mörkum til að efla aðstöðu og bæta þjónustu við sjúklinga.“ Á undanförnum árum hefur SAk byggt upp öflugt kerfi nærrannsókna með nokkrum tækjum sem tengjast rannsóknakerfi sjúkrahússins. Með tilkomu Hemoscreen er það kerfi styrkt enn frekar, sérstaklega í bráðaþjónustu þar sem tími skiptir miklu máli. Notkun tækisins er háð sérhæfðri þjálfun starfsfólks og fer öll starfsemi samkvæmt ströngum gæðakröfum undir faglegri yfirstjórn Rannsóknadeildar SAk. Gjöf Hollvina SAk er mikilvægt framlag til heilbrigðisþjónustu á Norðurlandi og styður við áframhaldandi þróun sjúkrahússins í takt við nútímakröfur. Hægt er að gerast Hollvinur með því að skrá sig hér: Gerast Hollvinur Árlegt styrktar- og árgjald er 6.000 kr.

Hollvinasamtök Sjúkrahússins á Akureyri hafa nýverið afhent sjúkrahúsinu tíu svokallaðar CADD-lyfjadælur. Um er að ræða litlar, rafknúnar dælur sem notaðar eru til að gefa sjúklingum lyf stöðugt eða eftir þörfum yfir ákveðinn tíma. Þær eru einkum nýttar í verkjameðferð og í líknarmeðferð, þar sem þörf er á nákvæmri og samfelldri lyfjagjöf. „Þetta eru mjög mikilvægar gjafir, sér í lagi þar sem þær dælur sem eru til á SAk eru orðnar barn síns tíma og fáar eftir sem hægt er að nota,“ segir Rebekka Héðinsdóttir, deildarstjóri á lyflækningadeild. Hollvinasamtök SAk hafa um árabil stutt við starfsemi sjúkrahússins með margvíslegum hætti og lagt sitt af mörkum til að efla þjónustu og aðbúnað sjúklinga. „Það er okkur í Hollvinasamtökunum mikilvægt að geta lagt okkar af mörkum til að bæta þjónustu við sjúklinga og aðstandendur þeirra,“ segir Jóhannes Gunnar Bjarnason, formaður stjórnar Hollvina . „Við vitum að þessi búnaður getur haft raunveruleg áhrif á líðan fólks á erfiðum tímum og erum stolt af því að styðja við starfsemi sjúkrahússins með þessum hætti.“ Þá má benda á að sendir hafa verið út greiðsluseðlar fyrir Hollvini með eindaga 1. maí. Árlegt styrktar- og árgjald er 6.000 kr. Hægt er að gerast Hollvinur með því að skrá sig hér: Gerast Hollvinur Á myndinni eru fulltrúar Hollvina og deildarstjóri og aðstoðardeildarstjórar lyflækningadeildar. Frá vinstri: Inga Margrét Árnadóttir, Jóhannes Gunnar Bjarnason, Kristín Sigfúsdóttir, Jóhann Rúnar Sigurðsson, Heiða Berglind Magnúsdóttir, Hermann Haraldsson, Rebekka Héðinsdóttir, Bjarni Jónasson og Ragnheiður Birna Guðnadóttir.

The body content of your post goes here. To edit this text, click on it and delete this default text and start typing your own or paste your own from a different source.

Við þökkum þeim fjölmörgu sem mættu á Dag sjúkrahússins á Glerártorgi um helgina, þá ekki síst þeim sem skráðu sig sem Hollvini. Við hvetjum öll sem geta til þess að gerast hollvinir, en árgjaldið er 6.000 kr. Hér er hægt að skrá sig: https://www.hollvinir.is/services

Hollvinasamtök Sjúkrahússins á Akureyri (SAk) ásamt starfsfólki sjúkrahússins standa fyrir hátíð á Glerártorgi laugardaginn 6. desember kl. 13-15. Starfsfólk Sak býður upp á mælingu á blóðþrýstingi, súrefnismettun og púlsi. Félagsmenn í Hollvinasamtökunum kynna starfsemi sína og skrá nýja félaga. Smáfólkinu býðst að koma með bangsa eða dúkkur í læknisskoðun. Mætum og gerumst Hollvinir!

Hollvinir Sjúkrahússins á Akureyri hafa fært dag- og göngudeild skurðlækna nýja gipssög. Sögin sem var fyrir var komin vel til ára sinna og var bæði hávær og óþjál í notkun. Gipssagir eru sérhannaðar til að saga eingöngu gifs án þess að særa húð. Nýja sögin er mun léttari, hljóðlátari og þjálari í notkun en sú gamla og léttir því störf hjúkrunarfræðinga á deildinni og gerir vonandi upplifun þjónustuþega deildarinnar af gipstöku betri. Við erum Hollvinum ákaflega þakklát fyrir að hafa veitt okkur þessa rausnarlegu gjöf.“ segja Þórgunnur Birgisdóttir, deildarstjóri dag- og göngudeildar skurðlækninga, og Eydís Unnur Jóhannsdóttir, hjúkrunarfræðingur á dag- og göngudeild skurðlækninga. Hvetjum fólk til að gerast hollvinir „Það er alltaf jafn gleðilegt að geta fært deildum sjúkrahússins tækjabúnað sem bætir þjónustu við sjúklinga og starfsaðstæður starfsfólks“ segir Jóhannes Bjarnason, formaður Hollvina og bætir við „Við þurfum á því að halda að starfsemi Hollvina eflist og að Hollvinir greiði þá greiðsluseðla sem berast í heimabanka, enda er það þannig sem við getum haldið áfram að veita gjafir sem þessar.“ Framlag Hollvina skiptir SAk sköpum Það er áhugavert að hafa það í huga að á síðasta ári afhentu Hollvinir Sjúkrahúsinu á Akureyri gjafir að verðmæti 62 m.kr. en fjárfestingaheimild SAk á fjárlögum á því ári var 200,6 m.kr. Gjafir Hollvina námu því um 31% af framlagi ríkisins til fjárfestinga árið 2024. „Framlag Hollvina skiptir SAk einfaldlega sköpum, sem og framlag annarra aðila í samfélaginu til sjúkrahússins. Það er hreinlega óhugsandi að sjá fyrir sér stöðu tækjabúnaðar á sjúkrahúsinu ef ekki kæmi til gjafa frá utanaðkomandi aðilum.“ segir Konráð Gylfason, framkvæmdastjóri rekstrar og klínískrar stoðþjónustu. Smellið hér til að gerast Hollvinur

Hollvinir færðu á dögunum legudeild geðdeildar rausnarlegar gjafir í formi húsgagna. Þegar höfðu borist stólar og borð inn í viðtalsherbergin, stofuborð í dagstofu, tveir lazyboystólar í öryggisenda deildarinnar og í gær kom svo einnig stórt sjónvarp fyrir öryggisstofuna. Undanfarið hafa umfangsmiklar breytingar verið gerðar á legudeildinni með það að markmiði að bæta aðstöðu bæði sjúklinga og starfsfólks. Með tilkomu húsgagnanna frá Hollvinum má segja að umbæturnar hafi náð enn lengra. MYND FV.: Konráð Gylfason, framkvæmdastjóri rekstrar og klínískrar stoðþjónustu, Inga Margrét Árnadóttir, meðstjórnandi Hollvina, Jóhann Rúnar Sigurðsson, varaformaður Hollvina, Hildigunnur Svavarsdóttir, forstjóri SAk, Hermann Haraldsson, gjaldkeri Hollvina, Bjarni Jónasson, meðstjórnandi Hollvina, Jóhannes G. Bjarnason, formaður Hollvina, Bernard Hendrik Gerritsma, deildarstjóri geðdeildar og Valborg Lúðvíksdóttir, aðstoðardeildarstjóri geðdeildar. Myndina tók Skapti Hallgrímsson.

Mikil stemming ríkti á Glerártorgi á laugardaginn þegar Hollvinir Sjúkrahússins á Akureyri héldu sinn árlega Dag sjúkrahússins. Fjöldi fólks lagði leið sína á viðburðinn þar sem boðið var upp á heilsufarsmælingar og félagar í stjórn Hollvina skráðu nýja meðlimi í samtökin. Einn vinsælasti viðkomustaðurinn var dúkku- og bangsaspítalinn þar sem börn fengu að koma með dúkkur og bangsa í skoðun. Í nokkrum tilfellum þurfti að sauma bangsa eftir nákvæma skoðun. Aðrir fengu plástra eða umbúðir fyrir tuskudýrin sín. „Það er varla hægt að hugsa sér jól án þess að við Hollvinir stöndum vaktina á Glerártorgi,“ sagði Jóhannes G. Bjarnason, formaður Hollvina. „Á þessu ári höfum við náð að gera mikið gagn fyrir sjúkrahúsið með framlögum okkar. Meðal annars höfum við gefið hitakassa, þvottavélar fyrir speglunardeild, öndunarmælingatæki og tvær glænýjar speglunarstæður.“ Hann bætti við að á næsta ári muni samtökin ekki slá slöku við og halda ótrauð áfram söfnun fyrir tækjum og búnaði. Á nýrri heimasíðu samtakanna er hægt að skrá sig sem félaga eða styrkja samtökin með peningagjöf - sjá hér. Ragnheiður Halldórsdóttir, framkvæmdastjóri lækninga SAk stóð einnig vaktina með stjórn Hollvina: „Hollvinir eru okkur ómetanlegir. Þeir styðja við starfsemi sjúkrahússins á svo margan hátt og hjálpa okkur að bæta þjónustu við sjúklinga.“ Dagur sjúkrahússins tókst afar vel og var góð þátttaka til marks um sterka tengingu samfélagsins við sjúkrahúsið og Hollvini. Fleiri myndir má sjá á Facebook-síðu Hollvina hér.

Barnadeild Sjúkrahússins á Akureyri (SAk) hefur fengið nýjan og fullkominn hitakassa af gerðinni Babyleo frá Dräger. Kassinn leysir af hólmi eldri gerð sem komin var til ára sinna og ekki lengur hægt að fá varahluti í. Nýi hitakassinn er bæði notendavænn og auðveldur í umgengni og mun nýtast afar vel á hágæslu nýbura á barnadeildinni. Á deildina leggjast inn veikir nýburar og fyrirburar sem fæddir eru eftir 34 vikna meðgöngu og eru hitakassar lykilbúnaður í meðferð þeirra. Á ári hverju leggjast um 40-60 börn inn á hágæslu nýbura og þurfa þau nánast alltaf að fá fyrstu meðferð í hitakassa. Oftast er um að ræða innlögn strax eftir fæðingu eða á fyrstu dögum eftir hana. Gjafmildi Hollvina hefur því tryggt barnadeildinni þennan nýja og mikilvæga búnað sem mun bæta aðbúnað nýburanna og stuðla að betri umönnun þeirra. „Það er ekki amalegt að fá slíkar gjafir frá Hollvinum og við erum mjög þakklát,“ segir Aðalheiður Guðmundsdóttir, deildarstjóri barnadeildar.

Dagur sjúkrahússins fer fram á Glerártorgi á laugardag 14. desember milli kl. 14 og 16. Starfsfólk SAk býður upp á mælingu á blóðþrýstingi, súrefnismettun og púlsi. Félagsmenn í hollvinasamtökunum kynna samtökin og skrá nýja félaga. Þar að auki verður bangsa- og dúkkuskoðun í boði þar sem börnum býðst að koma með uppáhaldsleikfangið sitt í læknisskoðun. Við hlökkum til að sjá ykkur sem flest.

Hollvinasamtök Sjúkrahússins á Akureyri (SAk) gáfu rannsóknarstofu lífeðlisfræðideildar SAk á dögunum nýtt öndunarmælingartæki. Nýja tækið (Vintus One) gefur möguleika á mismunandi tegundum öndunarmælinga, s.s. fráblástursmælingu, loftdreifiprófi, mælingu á rúmmáli lungna og sveiflumælingu. Aukin þjónusta – færri ferðir suður í rannsóknir „Með nýja tækinu getum við betur samræmt lungnarannsóknir á SAk við þær sem eru gerðar á Landspítala og bætt samstarf við sérfræðinga sem eru staðsettir þar. Með tilkomu tækisins getum við aukið þjónustu við einstaklinga á upptökusvæði SAk sem annars þyrftu að fara suður í rannsóknir. Lungnasérfræðingar sem eru staðsettir í Reykjavík geta nú fengið rannsóknir gerðar hér en það gefur jafnvel möguleika á auknu fjareftirliti þegar það hentar“ segir Jónína Þuríður Jóhannsdóttir, yfirlífeindafræðingur á rannsóknarstofu í lífeðlisfræði á SAk. Á myndinni frá vinstri: Telma Hrund Davíðsdóttir, sjúkraliði, Gunnar Þór Gunnarsson, yfirlæknir, Jóhannes G. Bjarnason, formaður Hollvina, Hermann Haraldsson, gjaldkeri Hollvina, Jónína Þuríður Jóhannsdóttir, yfirlífendafræðingur á rannsóknarstofu í lífeðlisfræði á SAk, Jóhann Rúnar Sigurðsson, varaformaður Hollvina og Birna Björgvinsdóttir, líftæknir á rannsóknarstofu í lífeðlisfræði á SAk. Myndina tók Skapti Hallgrímsson.

Vefsíðan er einföld í notkun og þar birtast fréttir af því góða starfi sem Hollvinir vinna með því að styrkja og styðja við sjúkrahúsið. Ennfremur er þar hægt að gerast Hollvinur með einföldum hætti og panta minningarkort til styrktar samtökunum. Með nýju vefsíðunni vonast stjórnin til að ná til fleiri félagsmanna og efla starfsemina enn frekar. „Nú í aðdraganda jóla förum við á fullt í að safna fleiri félagsmönnum og þá er gott að eiga þægilega að aðgengilega vefsíðu í farteskinu þar sem auðvelt er að skrá sig í samtökin,“ segir Jóhannes Bjarnason formaður Hollvina. Vefsíðan er ætluð sem vettvangur til að miðla upplýsingum og auðvelda áhugasömum að taka virkan þátt í starfinu. Það er von stjórnarinnar að nýja vefsíðan muni bæta samskiptin við núverandi og tilvonandi félagsmenn, og gera fólki auðveldara að sýna stuðning í verki. Áhugasamir geta nú þegar skráð sig í samtökin með því að smella hér.

Hollvinir Sjúkrahússins á Akureyri komu á dögunum færandi hendi með nýjar speglunarstæður á skurðstofur stofnunarinnar, eins og Akureyri.net greindi frá í síðustu viku. Þeir létu ekki þar við sitja heldur færðu speglunardeild einnig tvær nýjar þvottavélar. Þær taka við hlutverki eldri véla sem komnar voru til ára sinna og farnar að bila ítrekað. Starfsmenn segja mikilvægt að geta haldið úti ristil- og magaspeglunum með almennilegum þvottavélum fyrir tækin.

Hollvinir Sjúkrahússins á Akureyri færðu í dag skurðstofum stofnunarinnar formlega tvær glænýjar speglunarstæður sem taka við af þeim sem komnar voru til ára sinna. Speglunarstæður eru notaðar til að gera ýmiskonar aðgerðir þar sem hægt er að komast af með litla skurði. Þessar nýju veita bestu mögulegu tækni til að meðhöndla vandamál við góðar og öruggar vinnuaðstæður sem tryggja enn betur öryggi skjólstæðinga, skv. upplýsingum frá stofnuninni.